Jy kan nie die vrede wees vir iemand wat in oorlog met hulself is nie

Het jy al ooit probeer om iemand te red wat nie die moeite gedoen het om hulself te red nie?

As jy soos ek iemand is wat deur baie beproewings in hul leeftyd gegaan het, veroorsaak dit dikwels dat jy 'n geweldige vlak van empatie en deernis ontwikkel vir ander wat seer het.

Dit is wonderlik om die begeerte te hê om mense te help. Dit is die regte ding om ander te help wanneer ons kan, Jesus wil hê dat ons Sy hande en voete moet wees vir die wat seer en gebroke is.

Maar hoor my as ek sê jy kan nie iemand se vrede wees nie, anders leer hulle om op jou te vertrou in plaas van God.

Jy kan nie iemand regmaak wat nie bereid is om in die spieël te kyk en te oorweeg watter optrede, watter keuses en watter foute hulle gemaak het wat daartoe gelei het dat hulle op 'n plek was waarin hulle nie wil wees nie.

Jy kan nie toelaat dat iemand so hard en so lank op jou leun dat jy ’n permanente kruk word nie. Jy doen hulle 'n onguns om hulle nie die geleenthede te gee om hul eie wankelrige bene uit te toets en hul geloof te rek nie.

Jy kan nie iemand gelukkig maak deur hulle jou vreugde te laat steel nie.

Stel jou voor dat iemand 'n anker aan hul enkel vasgemaak het. Terwyl hulle besig was om te sink, het jy vir hulle 'n drywingstoestel gegooi, maar hulle het die manier waarop jy probeer het om hulle te red verwerp en daarop aangedring dat jy jou anker aan hulle s'n vasmaak sodat julle albei saam kon afgaan, toe daar reg binne hul bereik was daar 'n perfekte manier dat hulle hulself kon red. Sou jy dit doen? Waarskynlik nie, reg?

Om iemand se bron van vrede te probeer wees kan net van binne hulleself en van Jesus kom, en al jou pogings om hulle te red wanneer hulle nie gelukkig is met hul lewe en hulself en hul keuses nie, sal eenvoudig jou vrede, vreugde en geluk steel.

God het jou lankal reeds vergewe, wanneer vergewe jy jouself?

Ons sit verlede week by ons kerk se sel groep, natuurlik, dis dan Woensdag aand, dit is uit oudergewoonte hoe die week se skedule verloop. Nietemin, maak ons beurte om die tafel om te vertel hoe dit met jou gaan. Ek benut die voordeel daarvan om op die verste punt van die tafel te sit en die amper-laaste spreekbeurt te hê om gou ‘n mooi antwoord in my gedagtes te formuleer, terwyl ek in gedagte hou dat niemand tog hier is om te hoor hoe dit werklik gaan nie, ons leef nie meer in so samelewing waar die ‘Hoe gaan dit?’ opreg geantwoord word nie. Nee, ons is al mooi gekondisioneer: “Goed dankie en self?” – dis nou indien jy wel nog een van diegene is wat ‘dankie’ sê en wedersydse belangstelling toon.

Intussen baklei my hart en kop in splitsekondes met mekaar, en vir ‘n oomblik is ek werklik so in verwondering hoe ons brein die vermoeë het om in splitsekondes aan letterlik honderde dinge gelyk te kan dink..inelkgeval, die mooi, netjies en agtermekaar gedagtes rofstoei met die waarheid wat werklik in my hart rond sluip – ek is nie nou so heeltemal great en okay nie. Aan die een kant wil ek nie kla nie, hoe kan mens kla met ‘n wit brood onder die arm. In my lewe is ek skatryk – nie met die tipe bank balans waar ek my eie rekening wil hack nie, maar skatryk in liefde van my fenominale ouers en hartsvriende, goeie gesondheid, ‘n werk wat ek werklik voor lief is, en dan natuurlik al die honderd duisend ander dinge wat mens so graag as vanselfsprekend in ons lewens aanvaar..

Maar iewers is my hart en kop nie meer so lekker in lyn nie en is daar nie net loadshedding in ons straat nie, ek ervaar so bietjie loadshedding in my hart ook – en ek wonder meteens waar is God om die ligte aan te sit, en for that matter, die ligte aan te hou? Hy verwag van my om ‘n helder liggie vir die wêreld te skyn, maar dit voel of daar ‘n emmer oor hierdie liggie gesit is. ‘n Emmer van moeg wees, die tipe moeg wat slaap nie in ‘n oogwink gaan regruk nie. ‘n Emmer van onsekerheid in myself, ‘n emmer van hartseer oor alles wat seermaak en dinge wat ek nie verstaan nie, ‘n emmer van self-verwyt van die foute wat ek maak en dan bid en jammer sê net om weer dieselfde foute te maak. ‘n Emmer van wegkruip want ek wil nie gesien word nie, deels oor skuldgevoelens wanneer die duiwel my so graag kom herhinner van elke liewe detail van my sondige natuur, en deels omdat sosiale media ‘n ontevredenheid oor myself begin kweek het – ook net omdat ek dit toegelaat het. Soveel emmers, so min lig.

Ons almal het ons eie emmers wat ons self oor ons liggies sit. Dis bietjie soos om jouself op ‘n Stage 6 loadshedding te sit terwyl die elektrisiteit eintlik aan is.

Hierdie gedagtes bly deur die loop van die week by my en ek ervaar meteens seker die eerste en enigste ‘Ah’ oomblik: Ons kan nie vir God vra waar Hy is omdat Hy vêr voel, as ons die een is wat wegkruip omdat ons skuldig voel nie. God is nie vêr of kwaad nie, ons is kwaad en vol onvergifnis – teenoor onsself! Die resultaat? Ons voel nie ons verdien om in God se geselskap te wees nie, en ek weet virseker hierdie sondaar doen nie, maar in ons identiteit is ons eers God se kind voor ons sondaars is, ‘n sondaar wat wel overdose op genade, maar ons is eerste God se kind, dit is wat Hy oor ons spreek, ongeag.

Ek reflekteer aan elke keer wat ek die swart skapie was wat in self-inflicted loadshedding gesit het, dit was nooit God wat die ligte afgesit het nie. Dit was ek. Soos Adam en Eva toe hulle van God weggekruip het oor skaamte en skuldgevoelens, onvergifnis teenoor hulself. Aan die een kant is dit seker goed dat die Heilige Gees my kom convict van die foute in my lewe, maar aan die ander kant is dit – soos ek nou besef het – van kardinale belang dat ons leer om ons foute met genade en vergifnis te hanteer soos ons dit van God vra. Ek kan nie van Eksom verwag om die main switch aan te skakel sonder dat ek my eie skakelaar gebruik en dan kla omdat dit donker is nie. Die tyd het gekom, soos vir Paul, om in die tronk ‘n midnight-miracle te ervaar. Jy mag jou liggie skyn, jou loadshedding is net tydelik, dit is nie jou identiteit nie.

Leer om jouself te vergewe, voordat jou skuldgevoelens jou gaan leer om al verder van God af weg te dwaal omdat jy dink Hy is kwaad of unforgiving nie, Hy is nie, inteendeel, Hy het jou vir Homself geskape en jy is Syne – Hy sal jou nooit alleen los nie. Sy liefde en genade is groter as enige skaamte of skuldgevoel en Sy genade groter as enigiets wat ek met hierdie einste brein wat aan soveel dinge op ‘n slag dink wanneer mense om ‘n tafel gesels, nooit sal kan begryp nie.

MooisteVrou, haal die emmer van jou kop af en gebruik dit om jou pad te begin mop. Ek weet dit klink waansinnig, maar dink net vir ‘n oomblik daaroor. God het jou reeds toegerus om jou liggie te laat skyn en om die regte pad te volg, en Sy genade-emmer loop oor wanneer ons foute maak. Moenie jou liggie verdof en jou pad vuil hou omdat jy voel jy underserving van God se genade is of te vêr weg nie, God wil net hê jy moet huistoe kom. He created you for Him, and He loves you too much to leave you as He found you.

Vergewe jouself vir die kere wat jy nie ma, dogter, suster of vriendin van die jaar was nie – die lewe gebeur en voor jy dink jy gaan nog tyd maak om iets van jou honderde to-do lysies aft e tick, dan is jou emmer reeds leeg en dis okay om tyd vir jouself te vat, jy moet tyd vir jouself vat anders is jy besig om vanuit ‘n leë koppie ‘n groot slukkie niks te skink – ons almal het dit al probeer en ons elkeen kan getuig hierdie poging baat niemand niks.

Vergewe jouself vir die kere wat jouself teleurgestel het en dit verwar met teluerstelling van God. Hy ken jou hart, ongeag jou aksies. As jy verkeerd was ken Hy dit ook, dis nie ‘n groen kaart om te maak en breek met mense se gevoelens soos jy wil nie – maar give it time, give it grace and give it to God. Wanneer jy voel jy het jouself en Hom teleurgestel, én wanneer jy teleurgesteld voel as gevolg van omstandighede. Onthou altyd, God bly dieselfde al verander my omstandighede, en God bly dieselfde al verander my omstandighede nie. He’s always working all things together for good for those who love Him. Dis ‘n belofte reg uit die Bybel, dis nie voelgoed-fêncy woorde vir ‘n blog nie. Vertrou op Sy waarheid, al maak dit nie nou dadelik vir jou sin nie.

Vergwe jouself, want die laste wat jy nou so swaar aan dra het Jesus reeds vir ons onthalwe aan die Kruis gedra. Hy het dit juis gedoen soda tons laste lig sal wees om te dra. Ek weet ons is almal fenominale, sterk vroue, en al kan die wêreld dit nie nog harder skree nie, wil ek jou graag herhinner dat dit nie ‘n vereiste vir vrouwees is om alles op jou eie te wil doen en dra nie. Vergewe jouself, sit dit neer en rus bietjie by jou Skepper – dis nou jou beurt aan hierdie tafel en Hy wil hoor hoe dit werklik met jou gaan, sonder emmers en sonder loadshedding. As jy tans in ‘n seisoen van emmers en loadshedding is, is di took reg – God wil dit steeds hoor. Hy bly dieselfde God, ongeag die seisoen waarin jy jouself tans bevind.

Liedjies om te luister:

Same God – Elevation Worship

Kind - Cory Asbury

Greater Still – Brandon Lake

Pride of a Father - Hillsong young & live

Baie liefde,

Rouxnette 😊

Here, die wapens bly vorm - hoe wen ek hierdie oorlog?

Ek weet wat ek vir julle beplan, sê die Here. Voorspoed en nie teëspoed nie. ‘n Hoop. ‘n Verwagting.

Baie dae ervaar ek nie die voorspoed wat God vir my beplan nie. Ek sien nie altyd die blink, hoopvolle toekoms waarin ek moet glo nie. Ek sien nie die deurbrake in my of die mense om my se lewe nie. Ek sien nie die uitkoms of voorsiening nie. Ek sien nie die beterskap nie.

Ek sien nuus hooftrekke van die 4jarige Bokgabo Poo wat grusaam vermink, verkrag en vermoor is. Nicoleen Swart wat hulpeloos deur haar gewelddadige man aangerand word. Bejaardes wat met R1450 welsynstoelae moet oorleef nadat hul swaarverdiende pensioengeld op die Krion-piramideskema verloor is. Die Bontheuwel-ma wat naak foto’s van haar 4 jarige dogter op die donker web verkoop het.

Lendelam sinkdak-huisies waarin mense soos diere moet leef. Brandsiek honde waarvan die skedel duidelik sigbaar is, wat honger oor die pad strompel. Mense wat uit vullis dromme eet. Kinders wat kaalvoet in die rommel op die sypaadjie sit. Tiener dogters wat met kamerjasse in die straat loop met een baba op die heup en die volgende een in die maag. Seuns wat bedrywig is met bende-aktiwiteite. Ooms in blou overalls wat onder bome lê en flou gedrink is aan te veel ‘rooi proppie’, gekoop met geld wat vir kos bedoel was. Straat kinders wat tik langs besigheidspersele gebruik.

Ek sien mans wegstap van hul vrou en kinders om hul eie drome na te jaar. Kinders wat weghardloop uit hul ouerhuise reguit in die arms van okkultis in. Bedorwe kinders wat selfgesentreerde volwassenes raak.

Ek sien baie dinge, maar ek sien nie hoe ons as gelowige, Christen-vroue hierdie dinge aanspreek nie. Ek sien nie hoe ons God se Wapenuitrusting aantrek en weerstand bied teen die boosheid in ons land nie. Ek sien nie hoe ons met die outoriteit wat God vir ons gegee het, vir ons self en ons huis en ons naastes veg nie.

Efesiërs 6:12:” Ons stryd is nie teen vlees en bloed nie, maar teen elke mag en gesag, teen elke gees wat heers oor hierdie sondige wêreld, teen elke bose gees in die lug. Trek daarom die volle wapenrusting aan wat God julle gee, sodat julle weerstand kan bied in die dag van onheil.”

Ons is naïef om te dink dat die duiwel nie bestaan nie. En ons maak ‘n fout om te dink dat hy nie ons hoopvolle toekoms gaan aanval nie. God het nooit gesê dat die wapen nie gaan vorm nie. Hy het gesê dit sal nie slaag nie.

Moet my nie verkeerd verstaan nie. Baie van die dinge wat in die wêreld gebeur is as gevolg van ons eie toedoen. Dit is die direkte gevolge van ons eie sondige gewoontes en slegte besluite. As sekere gedrag, situasies en versoekings egter in iemand se lewe herhaal, behoort ons fyn te observeer.

Jesus het gekom om ons vry te maak en te verlos van sonde. Die duiwel wil ons steeds in ‘bondage’ hou. Hy doen dit deur ons blind te maak vir ons sonde. As ons blind is, bely ons nie ons sonde nie. Ons sien nie die waarheid van God se woord nie. Ons sien net die pyn en seer van die wêreld. Die armoede, die haat, die onregverdigheid, die korrupsie, die geweld, die liefdeloosheid. Ons sien nie die bindinge oor ons lewens nie. Ons sien nie die geeste wat in ons huise, vriendekringe en werksplekke manifesteer nie. En omdat ons nie sien nie, doen ons niks daar aan nie.

Is daar onmin in jou huis of loop jy gereeld deur onder jou man se woede-uitbarstings? Die gees van jalousie manifesteer (veroorsaak / trek aan) woede, wraak, haat, twis, afguns en verdeling.

Is jy al weer die besprekingspunt onder jou kollegas of word jy vals beskuldig en afgedank? Die gees van leuens manifesteer misleiding, beskuldigings, skinder en leuens.

Voel dit vandag vir jou asof die teëspoed jou van alle kante af tref? Hoop jy nie meer vir ‘n beter more nie? Kan jy nie die lewe aanpak na die verlies van ‘n geliefde nie? Die gees van swaarmoedigheid manifesteer, selfbejammering, wanhoop, neerslagtigheid, depressie, self moordgedagtes, verwerping, oormatige rou.

Oorweeg jy ‘n aborsie omdat jy skaam en alleen voel en die matriek eksamen nog voorlê? Kyk jou man na pornografiese beeldmateriaal terwyl jy slaap? Is daar ‘n familielid of familie vriend wat jou of jou kind gemolesteer het? Die gees van perversiteit manifesteer aborsie, kindermishandeling, pornografie, bloedskande, vuil gedagtes.

Is daar onvergewensgesindheid en stilswye in jou huwelik? Gaan slaap julle kwaad of slaap jy al vir weke in die spaarkamer? Kan jy onthou wanneer laas julle vir mekaar kon jammer sê en daadwerklik probeer beter wees? Die gees van hoogmoed manifesteer trots, arrogansie, rebellie, verwerping van God.

Het jy groot geword in ‘n huis waar drank volop en liefde yl gesaai was? Of is dit die huis wat jy tans vir jou kinders skep? Gryp jy na drank, kos of dwelms elke keer wanneer die lewe jou oorweldig? Is jy afhanklik van pynmedikasie vir ‘n kopseer wat lankal nie meer bestaan nie? Is jy in die kloue van verslawing? Die gees van slawerny manifesteer verslawing en kompulsiewe sonde.

Verwag jy die ergste, want die ergste is wat jy nog jou lewe lank kry? Skrik jy saans wakker van angsaanvalle? Of kan jy nie slaap weens jou vrees vir ‘n inbraak nie? Word jou kleuter geteister in sy of haar drome en kry jul huishouding nie behoorlike rus nie? Die gees van vrees manifesteer fobies, twyfel, angstigheid, stres en ‘night terrors’.

Is jou tienerseun ‘n boelie? Moet hy die skooljaar herhaal? Luister jou kinders nie na raad nie? Slaan hulle nie ag op julle huisreëls nie? Die gees van dwaling maak ons onleerbaar, argumenterend, verdedigend en ononderdanig.

Dalk is jy so diep in die skuld dat selfs ‘Konsolideer’ jou nie eers kan help nie. Dalk is jy suinig en jou hand toe vir die behoeftes van ander. Dalk heers daar luiheid in jou gesin en moet jy alles in die huis alleen behartig Dalk het jy in armoede groot geword en wy jy al jou tyd en energie aan jou loopbaan. Die gees van armoede manifesteer gierigheid, luiheid, plundery, diefstal, toesmeer van sonde, gebrek aan vrygewigheid

Mooistevrou, ken jy jou krag in God? Weet jy dat God vir jou die outoriteit gegee het om in Jesus se naam hierdie bindings te breek en geeste te verdryf? Hy het vir jou onderskeidsvermoë gegee om waarheid van boosheid te onderskei. Hy het vir jou Sy volle wapenrusting gegee: verlossing, vryspraak, waarheid, geloof, vrede en die Heilige Gees om jou in hierdie taak by te staan.

Identifiseer die wapens wat teen jou en huis gevorm word. Begin om dit wat die duiwel by jou gesteel het, terug te vat deur gebed. Beskerm dit wat God vir jou gegee het en steeds beplan, deur gebed. Bid vir jouself. Bid vir jou man en kinders daar waar hulle slaap. Bid jou vriende om die braaivleisvuur. Bid vir jou huis. Jou inkomste. Jou dorp. Die skole. Bid daar waar jy beweeg, daar waar jy versoeking en aanval ervaar. Geestelike oorlogvoering is nie iets wat jy vir die wêreld hoef uit te basuin nie. Dit is iets wat jy stil en ernstig en doelgerig op jou knieë doen.

Mooistevrou, as ons nie wakker is nie, kán bloedlyn sonde en geestelike bindings by ons begin. As ons nonchalant is kán dit deur ons voortduur. Maar as ons gehoorsaam is, kán dit by ons stop. Wat kies jy vir jou nageslag? Wat doen jy met die wapens wat teen jou vorm?