Dankie, ‘klippie-uit-die-pad-rol’ mens

Deur Susan Westraadt

Vandag was een van dáái dae. Een van daai waar jy teen son opkoms aanvaar dat dinge eenvoudig nie volgens plan gaan verloop nie. Een van daai waar elke moontlike ding wat kan skeefloop, lélik skeef loop. Ons almal ken daai dae.

Dit is gewoonlik ook op hierdie dae wat ons voel ons staan alleen. Ons teen die wêreld met niemand wat ons hand vashou of staande hou nie. Niemand wat vir ons veg of intree nie. Niemand wat bewus is van die intensiteit van wat ons regtig beleef nie.

Terwyl ek om 19:00 op ’n Donderdagaand die blik formule in my kombuis omhels wat ’n mede mamma (op kort kennisgewing) vir my van die buurdorp saamgebring het, kry Psalm 91:11 vir my nuwe betekenis.

“Hy sal Sy engele opdrag gee om jou te beskerm waar jy ook al gaan. Op hulle hande sal hulle jou dra, sodat jy nie jou voet teen 'n klip sal stamp nie.”

Mooistevrou, vandag wil ek jou herinner dat God se Woord en Sy beloftes bly staan. Deur die eeue heen. Gister. Vandag en vir altyd. In ons haas, kyk ons soms die praktiese uitvoering van hierdie beloftes in ons lewens mis.

Ons moet besef dat die verhouding wat ons met mense het, belangrik is. God gebruik mense om vir ons geleenthede te skep en uitkoms te bewerkstellig. Hy werk deur mense om vir ons te voorsien, te beskerm en te motiveer. So dikwels maak ons met ons optrede, woorde en gesindheid deure toe waardeur ons in die toekoms sou moes stap.

In hierdie lewe is ons 1 van 2 soorte mense en stap ons die pad saam met 1 van 2 soorte mense: klippie-uit-die-pad-rol-mense en klippie-in-die-skoen-mense.

So dikwels fokus ons al ons aandag en energie op die klippie-in-die-skoen-mense wat die lewe moeilik en onplesierig maak. Ons is nie eers bewus van die klippie-uit-die-pad-rol mense vir wie God strategies op die regte tyd en op die regte plek in ons lewe geplaas het sodat ons nie ons voet teen ‘‘n klip sal stamp nie’.

Vandag wil ek dankie sê vir al die klippie-uit-die-pad-rol-mense in my lewe. Dankie, dat julle stop en help, al stap ons nie noodwendig elke dag saam ‘n pad nie. Dankie, dat jy sensitief, gehoorsaam en beskikbaar is vir God se opdragte. Jy maak die pad draagliker. Meer begaanbaar. Korter. Makliker. Ligter. En meer gelyk.

Dankie, klippie-uit-die-pad-rol-mens wat na ’n lang sport dag en met ‘’n kar vol kinders letterlik uit jou pad gaan om vir my formule van die buurdorp af te bring. Vandag was vir my ’n uitmergelende dag en ek kon nie alles gedoen kry nie.

Dankie, vir jou met jou lang en lenige lyf wat vir my die laaste boksie koffie hoog bo en vêr agter op die winkelrak aangee, my bene is te kort en my rok is nie geskik om so te rek en strek nie.

Dankie, liefste Take-lot-man wat vir mý dankie sê vir al die pakkies wat jý by my huis kan kom aflewer. Jy leer my iets dieper van dankbaar wees en met ander oë na die lewe te kyk.

Dankie, vir jou, juweel en staatmaker vrou wat elke dag ons huishouding bymekaar hou. Al verstaan ek nie aldag hoekom jy met ons Engels praat en met die honde Afrikaans nie, is ek so dankbaar vir dit wat jy elke dag vir ons doen en beteken.

Dankie, vir jou professionele besigheidsman, wat gereed staan met eerlike en kundige advies. Jy het ons oor die jare baie geleer van eerbaar besigheid doen, risiko’s identifiseer en daarvoor voorberei.

Dankie, vir jou, mede mamma, wat ’n boodskap stuur om te hoor hoe dit met my olike kindjie gaan, raad te gee en sterkte te sê, dit help om te weet dat die wêreld nie van ons vergeet het nie.

Dankie, vir jou wat op nommer 99 gereed staan met ‘n platter eetgoed vir nog ‘n funksie, dit haal soveel hooi van my vurk af.

Dankie, vir jou wat my vol skedule akkommodeer, my naels en hare versorg en my hart pamperlang, dit is dikwels die enigste bederf wat ek kry.

Dankie, vir jou wat aanbied om ’n Saterdag ons kinders te vermaak, sodat ons ons tenke kan gaan vol maak. Ons het die uitkomkans só nodig.

Dankie, vir jou wat die hekkie by die kleuterskool vir my oophou terwyl ek soos ’n pakdonkie my dogter, haar skooltas, beddegoed, doeke en háár ‘baba’ betyds by haar klas probeer besorg.

Dankie, vir jou wat my kinders versorg en leer terwyl ek werk. Ek sien hoe hulle grootword en weet hoe klein my aandeel in hulle vaardighede is. Dankie, dat ek weet hulle is veilig en geliefd en dat ek kan fokus op hul waardes en karakter. Ek beny julle geduld en die ongelooflike gawe wat julle gekry het.

Dankie, vir jou wat vir my komplimenteer oor my hare, grimering of rok, juis op die oggend wat my gemoed soos al die ongestrykte wasgoed voel.

Dankie, vir jou wat ‘n boks druiwe of koekies by my huis kom afgee, ’n lekkerny maak altyd ’n moeilike dag beter.

Dankie, vir jou wat my bederf met my gunsteling sjokolade of bos blomme. Daar lê ‘n ander soort liefde in effort.

Dankie, vir jou wat my eer beskerm en my oordeel op dit wat ek al vir jou gewys het en nie op dit wat ander van my vertel nie.

Dankie, vir jou by die vulstasie wat my motor se voorruit was, ek kon vir ’n geruime tyd nie lekker sien as die son sleg skyn nie.

Dankie, vir jou wat my sakkies by die betaalpunt pak, my aankope veilig in die kattebak besorg en die trollie terugneem winkel toe, dit was die eerste ding waarmee ek nie vandag hoef te gesukkel het nie.

Dankie, vir jou, liefste vriendin wat moeite maak om te kom kuier, voice notes te stuur, regtig te bid en wat in my drome glo. Dankie dat jy deel is van my oorwinnings en teleurstellings. Dankie, dat ons op ’n Saterdagoggend kan gaan Titanic fliek en ons kan huil oor meer as net die werkersklas wat onder in die boot toegesluit word en die reddings bote wat nie wou teruggaan om nog mense te red nie.

Dankie, vir jou wat my wese verstaan, my aanspreeklik hou, die reguit woorde praat en die moeilike gesprekke met my het. Jy hou my op die reguit pad en help my om my beste self te wees.

Dankie, vir oudkollegas wat inloer, vir my die beste toewens en my steeds laat voel soos die beste leier in die wêreld.

Dankie, vir nuwe kollegas wat vertroue in my stel, hulle harte vir my oopmaak (en een van twee prams stoot sodat ek ook kan gaan saam stap).

Dankie, vir jou Mooistevrou, wat hierdie blog lees en deel. Julle skep ’n platform waar God mense op ’n kragtige wyse kan bereik.

Ek is dankbaar vir jou, Klippie-uit-die-pad-rol-mens. Jy is die lafenis op ‘n warm dag. Die skadu waarin ek vir u rukkie kan rus. Jou vriendelikheid en behulpsaamheid mag dalk vir jou gering of onnodig lyk, maar vir my maak dit saak. Vir my beteken dit iets. Vir my maak dit ’n moeilike dag beter. Die wêreld het meer van jou kaliber menswees nodig. Jy inspireer my om ook ‘n Klippie-uit-die-pad-rol-mens vir ander te wees.

Ek bid dat jy wat hier lees se pad besaai sal wees met Klippie-uit-die-pad-rol-mense. Ek bid dat jou geestelike oë wa-wyd wakker sal wees vir die “Engele” wat God op jou pad plaas. Ek bid dat daar sal mense wees wat jou op die hande dra. Wat met jou vriendelik en gaaf sal wees. Wat saam met jou opgewonde is vir jou suksesse en vir jou die beste bedoelings het. Mense wat jou laste minder maak en jou hart ligter maak. Ek bid dat jy nie jou voet teen ‘n klip sal stamp nie. En ek bid dat wanneer die Klippie-in-die-skoen mense jou voete seermaak, jy nie bang sal wees om jou skoene uit te trek en aan te beweeg nie. Dat jy nie sal struikel, sal val of seerkry sonder klippie-uit-die-pad-rol mense naby om jou op te help nie.

Jy is nie ‘n sissie nie – jy is ‘n vasbyter!

Mooistevrou, is jy okay?

As ek vandag vir jou vra hoe dit met jou gaan, sal jy kan eerlik wees of gaan jy vir my die generiese: “Goed dankie en met jou?” antwoord gee? Hoe gaan dit régtig met jou? Leef jy? Of oorleef jy?

Huil jy saans jou kussing sopnat omdat jou man of kind gesterf het? Het jy ‘n huppel in jou stap of sleep jy jou voete saam met jou deur die dag? Glimlag jy soggens vir jou refleksie in die spieël of laat die ongewenste plooie en dubbel ken jou hart sink? Is jy dankbaar om te kan werk toe gaan, of sit jy leweloos op die bed se rand - onseker oor presies hoe jy deur die dag sal kom?

Voel jy gesond en gemaklik in jou lyf, of is daar nie meer klere in die kas wat gemaklik sit en die ekstra kilogramme verbloem nie? Werk jy elke dag kliphard en tog bly elke maand langer as wat jou salaris strek? Is jou huwelik ‘n stryd waar jy meer verloor as wen? Staan jy onvervuld, al dien jy?

Is jy moeg? Die tipe moeg wat slaap nie kan beter maak nie? Is jy oorweldig deur al die nimmereindigende rolle wat jy daagliks moet vervul? Is jy uitgebrand om dokter, berader, onderwyser, beplanner, leier, raadgewer, dissiplineerder, kok, skoonmaker, onthaler, vermaker, versorger, vrou, ma, kollega, suster en vriendin te wees?

Is jou google kalender stampvol aktiwiteite en verpligtinge, maar nie een van hulle is vir jóú nie? Is jy moedeloos oor die krag situasie en die impak daarvan op die voortdurende prysstygings? Is jy bekommerd omdat jou salaris nie meer genoeg is om die basies kruideniers mandjie te kan bekostig nie? Boer jy agter uit al probeer jy hoe hard om vorentoe te beweeg?

Is jy verbitterd omdat jy verstoot, verwerp en vergeet word deur die vir wie jy nog net goed was? Is jy skaam oor ‘n onvergeeflike fout wat jy begaan het? Is jy in die greep van ‘n verslawing wat jy nie kan erken nie en waaruit jy ook nie kan loskom nie? Wil jy moed op gee op die lewe omdat almal met jou moed op gegee het? Is jy in die middel van ‘n storm en beleef jy die een terugslag op die ander? Probeer jy om die vure om jou te blus, maar die probleme is meer as wat jy kan hanteer?

Mooistevrou, vandag moet jy mooi luister en fyn lees. Ek wil hê jy moet weet dat jý die potensiaal het om beter te wees. Jy moet weet dat jóú lewe en jóú môre die potensiaal het om beter te wees.

Hierdie diep, donker en eensame plek waar jy jouself vandag bevind, is nie jou eind bestemming nie. Dit is nie die storie van jou lewe nie. Dit is nie hoe jou storie eindig nie. Dit is net ‘n hoofstuk. Dit is die wildernis waardeur jy moet gaan om by jou Kanaan uit te kom. Jou Kanaan lê en wag vir jóú. Ek belowe. Maar meer as dit, God belowe.

Hierdie ding wat jy in die gesig staar is tydelik. Al voel dit nimmereindigend. Al voel dit of die mure van jou omstandighede jou vasdruk en jy geen uitkom kans sien nie. Dit sál verby gaan. Dit sál beter word. Jy sál hierdeur kom. Met intensionele besluite, met daadwerklike optrede, met God se genade en met Sy leiding.

Moenie dat ‘n 40 dae reis in 40 jaar in die woestyn verander a.g.v. ongehoorsaamheid en impulsiewe besluite nie. Gaan hoor by God wat jou volgende stap moet wees. Watter afdraai jy moet vat. “A good man’s steps are ordered by the Lord”.

Neem kennis: God se uitkoms lyk selde soos die plan in jou kop. Hy werk en voorsien op wonderbaarlike maniere. Maniere waaraan ons nie eers kan dink nie. Hy werk in ander dimensies waarvan ons nie eers bewus is nie.

Jou lewe het ‘n doel. Jý het ‘n doel.

Moenie opgee op die lewe nie. Die trauma, die verlies, die pyn, die tekort, die onsekerheid...dit is ‘n oomblik in vergelyking met die res van vir ewig. “This too shall pass.” Dra jou kruis terwyl jy wag vir jou kroon.

Volhard. Jy moet aanhou beweeg. Weg beweeg van dit wat jou siel breek. Moenie die seer met jou saamdra nie. God wil en kan jou vrymaak daarvan.

Jy gaan nie net hierdie ding oorleef nie, jy gaan as oorwinnaar uit die stryd tree. Tree net. Jy gaan beter, sterker, wyser, meer toegerus en dankbaar uit die woestyn stap as wat jy daar in gestap het.

Mooistevrou, jy sal weer okay wees. Daar is soveel mooi en goed om na uit te sien.

Hoe weet jy dat alles wat jy nodig het en na hunker nie aan die ander kant van depressie, verslawing, egskeiding, siekte en uitbranding lê nie? Die volheid van die lewe ís vir jóú beskore - nie net vir ander nie.

Jou oë en hart sál weer saam met jou mond lag.

Jou slapelose nagte sál weer tot ‘n einde kom.

Jy sál deur die maand kom.

Jy sál weer vrede en vergenoegdheid ken.

Jy sál weer liefde vind.

Jy sál weer vertrou.

Jy sál jou studies voltooi.

Jy sál daai bevordering kry.

Jy sál alles oorwin wat jy tans beleef.

Alles op die regte tyd.

Jy is nie ‘n sissie nie, jy is ‘n vasbyter!

Byt vas, mooiste vrou.

Byt net nog ‘n rukkie vas.

Onderdanig, onafhanklik en onweerstaanbaar.

Onderdanig.

Is dit iets wat jy kan wees? Spontaan en sonder teenstand? Of kom daar iets binne jou feministiese hart in opstand wanneer jy hierdie woord hoor?

Ek wonder hoekom dit vir die hedendaagse vrou so moeilik is om onderdanig te wees? Dit is tog ’n Bybelse beginsel – een wat deur die eeue heen op slegs een skrifgedeelte gebaseer word en so misverstaan word: Efesiërs 5:22: “Vrouens, wees aan julle mans onderdanig, net soos julle aan die Here onderdanig is. Die man is die hoof van die vrou, soos Christus die hoof van die kerk is.”

Ek weet nie van jou nie mooiste vrou, maar vir my lê die kruks van die skrif nie in vrouens wat onderdanig moet wees of in mans wat die hoof van die vrou is nie, maar in “soos aan die Here” en “soos Christus”.

Vrouens is nie God se slawe nie. Ons is sy kinders en sy dienaars.

God is ook nie ’n slawedrywer en diktator nie. God is liefde.

Galasiërs 3:28 sê “In Christus is ons almal een.”

1 Korintiërs 7:3: “Die man moet sy huweliksplig teenoor sy vrou nakom, en net so moet die vrou ook haar huweliksplig teenoor haar man nakom.

Daar is soveel skrifgedeeltes in die Woord wat daarop dui dat oorheersing en eensydige onderdanigheid nie God se bedoeling vir die huwelik was nie, eerder wedersydse inspraak en kameraadskap, tog het onderdanigheid ’n tradisie en kultuur geword wat mans afdwing en vrouens teen skop.

God het vir mans ’n gees van outoriteit gegee en van vrouens ’n gees van onderskeidingsvermoë. Mans en vrouens vul mekaar aan. Vrouens het die vermoë om te onderskei of ‘n besluit of idee uitvoerbaar is of nie en mans het die vermoë om dit uit te voer en af te dwing.

Mooistevrou, wat veroorsaak dat jy en jou huweliksmaat so teen mekaar werk? Hoekom weier jy dalk vandag om onderdanig te wees soos Christus?

Gaan dit teen jou grein om onderdanig te wees aan ‘n man wat nie soos Christus is nie? Is jy van mening dat jou man selfsugtige en impulsiewe besluite neem sonder om God se wil te soek? Het jy so gewoond geraak om self besluite en beheer te neem omdat jy nooit op jou man kan reken nie?

Of is dit ’n kwessie van geregtigheid waar ons ons self wil laat geld? Sukkel ons as vroue dalk om onderdanig wees soos Christus? Is ons so “set in our ways”, dat ons nie ons mans toelaat om mans te wees nie?

Om die eersgenoemde probleem aan te spreek wil ek jou aanraai om onafhanklik te word.

Om die laasgenoemde probleem aan te spreek, wil ek jou aanraai om onweerstaanbaar te word.

Vroeër jare was die dinamika van die huishouding anders as vandag. Die man het gewerk en die broodwinner rol vervul, terwyl die vrou tuisgebly het om die kinders en die huishouding te versorg. Vrouens het makliker teruggestaan, omdat hul finansieel afhanklik was van hul mans. Van toeka tot nou loop vrouens onder mans deur wat hied en gebied en moet vrouens gebukkend staan onder die woorde en dade van mans wat nie soos Christus is nie. Mans vir wie óns gekies het. Mans wat waarskynlik hul ware kleure gewys het en waarvoor ons onder die bedwelmende verliefdheid kleurblind was.

Mooiste vrou, as jy vandag vir my wil skree dat jy nie onderdanig kan wees aan ’n man wat nie ’n verslawing wil aanspreek nie. ’n Man wat jou as ‘n slaansak vir sy vuiste of snybord vir sy woorde gebruik. ’n Man wat deur spandabelrigheid julle al dieper in ’n bodemlose skuld-put laat sink. ’n Man wat jou walg omdat jy die reuk van ’n ander vrou se parfuum aan sy klere ruik. ’n Man wie se liefdeloosheid en kulheid jou lewenslus blus.

Hierdie man is nie soos Christus nie. Vat jou onafhanklikheid terug. Maak klaar daai graad. Doen aansoek vir daai werk. Hê daai gesprek. Gaan kyk na daai woonstel. Benut jou talente en gawes. Dit gaan nie maklik wees nie. Dit sal met tye swaar gaan. Dit gaan slegter gaan voordat dit beter gaan. Maar daar sal uitkoms en verandering wees. Ons kan met soveel minder klaarkom as wat ons dink. Ons verdien soveel meer as wat ons glo. God werk op wonderlike maniere, ons moet net dapper genoeg wees om Hom te vertrou.

Vrouens wat onafhanklik raak, skep ’n wêreld wat mans dwing om meer soos Christus te raak. Mans is genoodsaak om te besin oor hul maniere en motiewe want vroue is nie meer genoodsaak om ’n huwelik te betree of in ’n huwelik te bly saam met ’n man wat nie godvresend is nie. Vrouens se kan ‘n bestaan maak sonder mans en daarom kan ons beter vir onsself kies. Onafhanklikheid skep ’n wêreld waar vrouens huwelike betree en in huwelike bly omdat hulle daar wil wees en nie daar móét wees nie.

Net soos wat onafhanklikheid ‘n vrou se stem kan terug gee, kan dit ’n man sin wegneem. In vandag se ekonomiese klimaat het dit nodig geword dat vrouens ook ’n inkomste verdien. In die werksplek moet vrouens veg om gelyk te staan, soms sit ons hierdie geveg by die huis voort en wil ons daar ook gelykstaan. Ons moet ons harte ondersoek en vir ons self vra hoekom? Wat is ons ware motief?

Dit is heeltemal moontlik om die groter salaris te verdien en steeds jou man as hoof van jul huis te eer. Geld koop nie daardie rol nie. Ongelukkig is daar mans wat niks anders het om te bied as geld nie. Hul is nie eerbaar nie. Hul is nie eerlik nie. Hul is nie betroubaar nie. Hul is nie liefdevol nie. Selfs nie eers bedagsaam of beleefd nie. Dalk is jy vandag met so ’n man getroud.

Daar is iets onweerstaanbaar aan ’n hoflike man. ’n Man wat so seker is van homself, dat niks wat ’n vrou doen of bereik of wat hy doen of bereik hom minder van ’n man kan laat voel nie. ’n Man wat jou motor band met ’n goeie gesindheid omruil of sy baadjie vir jou aanbied, is onweerstaanbaar. ’n Man wat streng, maar regverdig is, is onweerstaanbaar. ’n Man wat gras sny, kinders bad en skottelgoed was, is onweerstaanbaar. ’n Man wat vir jou ’n bad tap en ’n glas wyn ingooi voordat hy jou saans wil om duik, is onweerstaanbaar. ’n Man wat sy vrou versorg en vir haar voorsien omdat hy dit as sy plig en voorreg beskou, is onweerstaanbaar. ’n Man wat vir sy vrou ’n lewe en loopbaan buite die vier mure van hul huis gun – sonder om deur haar sukses geïntimideerd te voel, is onweerstaanbaar. ’n Man wat sy vrou se insae verwelkom en dit in ag neem voordat hy besluite neem, is onweerstaanbaar. ’n Man wat weet wanneer om vir sy vrou in te tree en wanneer om haar vir haarself te laat praat is onweerstaanbaar.

Elke vrou wil hê haar man moet onweerstaanbaar wees, maar dalk het dit tyd geword dat óns ook onweerstaanbaar word. ’n Vrou wat na haar voorkoms kyk, is onweerstaanbaar. ’n Vrou wat terugsit, haar man in die oë kyk en na hom luister (al verskil sy), is onweerstaanbaar. ’n Vrou wat haar wysheid by God gaan soek voordat sy haar opinie beterweterig aan almal uitdeel, is onweerstaanbaar. ’n Vrou wat haar man eer en prys, veral voor ander, is onweerstaanbaar. ’n Vrou wat ag slaan op haar man se wense en onderdanig is aan dit wat goed en billik is, is onweerstaanbaar. ’n Vrou wat self die mayonnaise bottel kan oopmaak, maar dit vir haar man neem sodat sy (woordloos) vir hom kan herinner dat alhoewel hy nie emosioneel sterker as sy is nie, hy wel fisies sterker as sy is, is onweerstaanbaar. ’n Vrou wat selfstandig en onafhanklik is en haar eie identiteit en doelwitte het, is onweerstaanbaar.

Ek weet nie wat jou omstandighede vandag is nie, Mooistevrou. Ek weet nie of jou man sukkel om ’n hoof soos Christus te wees en of jy sukkel om onderdanig soos Christus te wees nie.

Wat ek wel weet is dat God vir ons elkeen die vermoë gegee het om ’n Spreuke vrou te wees. Dat ‘n Spreuke-vrou hom behaag. Dat ’n Spreuke-vrou baie werd is. Dat haar man op haar staatmaak en die vrugte pluk van haar harde werk. Dat sy vir hom net voordeel inhou. Dat haar kinders haar prys en haar man haar bewonder. Dat haar huisgesin versorg is. Dat sy ’n kop vir besigheid het en met haar talente woeker. Dat haar man by haar insig kry voordat hy sy planne met ander deel. “Gee haar wat haar toekom vir alles wat sy doen; laat haar werk haar roem wees in die stadspoorte.”

Net soos wat ons moet leer hoe om ’n spreuke vrou te word, so moet mans leer om ’n Spreuke-vrou te benader en lief te hê. Wees geduldig en intensioneel met die proses en weet, dat dit nie in alle mans se broek sit om ’n Spreuke-vrou lief te hê nie.

Mag jy ten spyte hiervan kies om ’n Spreuke-vrou te wees. Mag jy praat met wysheid en lei met liefde. Mag jy kry wat jou toekom en mag jou werk (wat hierdie seisoen ook al van jou verg) jou roem wees in die stadspoorte.

Alles van jou spreek van ’n sterk en edel persoonlikheid.

Onderdanig. Onafhanklik. En onweerstaanbaar.