Sê is een ding, maar doen is aksie

Ons almal ken die gewilde aanhaling, “actions speak louder than words.” Hoe ouer ek word hoe meer glo ek aan daardie aanhaling. Mense is geneig om een ding te sê en die ander te doen of selfs net nooit te doen nie. Woorde word maklik rond gegooi om iemand gerus te stel, te “please” of voor te gee vir iets. Deesdae glo ek in aksies. As jou aksies wys dan glo ek die woorde wat volg.

Te veel keer in die lewe het ek gesien hoe mense een ding sê en daardie woorde nooit ‘n realiteit word nie. Dit is soveel makliker om ‘n situasie te hanteer met woorde as aksie en dus gebruik soveel mense hierdie metode. Maar op die ou end van die dag, spreek jou aksies boekdele. Jy kan soveel as wat jy wil met jou woorde toor, maar jou dade sal wys wie en wat jy werklik is.

Hoe meer jy ‘n ding sê, hoe groter verwagting skep jy by iemand.

Jy kan groot praat, die mooiste woorde uiter en allerhande beloftes maak – maar iewers gaan dit jou in haal. As jy nie jou mooi woorde en beloftes kan staaf met goeie gevolge nie, gaan jy verloor. Onthou, party mense sal altyd die goed in jou raak sien, maar die meerderheid gaan op ‘n stadium opgee en wegdraai, want leë beloftes maak skuld. Niemand hou daarvan om teleurgestel te word nie.

Ek dink as kind probeer mens altyd net die mooi in iemand raak sien, kinders is so onskuldig en dit is die mooiste eienskap van kinders wat ek elke dag wens ek het steeds. Tog, leer die lewe jou om jou hart te beskerm teen die mense wat net praat en leë beloftes maak. Vandag, sukkel ek om iemand bloot net te vertrou op woorde. Skepties om mense te glo, dalk het dit te doen met my persoonlikheid ook. Ek is altyd op soek na feite en bewyse.

So die slotsom van vandag is eenvoudig:

Moenie te veel praat, doen eerder.

Moenie te veel sê, wys eers.

Moenie beloftes maak, bewys is beter.

Geluk-dempers

Dink nie regtig daar bestaan ‘n woord soos “geluk-demper” nie, maar dis hoe ek dit beskryf. Mense wie jou helder liggie demp, dit is ‘n geluk-demper. Elkeen van ons het ‘n sterk liggie wat helder skyn, ons gees, ons hart en siel. Dinge in die lewe demp ons liggie, laat dit flouer en flouer skyn, dis nou maar die lewe. Dan is daar mense, wat nes dinge jou liggie wil demp, laat uit blaas.

Hierdie soort mens gun jou geen geluk. Hulle steel jou lig sodat daar geen gees in jou oor is. Stadig maar seker, bietjie vir bietjie.

Gewoonlik het hierdie geluk-dempers alles in die lewe. Goeie beroep, ‘n pragtige gesin, gesondheid, lekker vriende, sukses in alle aspekte, tog gun hulle ander geen geluk. Hulle saai kwaad oral waar hulle gaan om jou geluk al minder te maak. Gewoonlik met baie slim maniere - sodat geen vinger na hulle gewys kan word nie. Hulle is soos ‘n spieël, aan die voor kant blink en aan die agter kant maar redelik vaal. Tog sien die mense net die mooi, blink kant.

Hierdie geluk-dempers breek harte, roei siele uit en speel met lewens.

Geluk-dempers begin sommer al van vroeg af, in die skole onder die kinders en so word dit van kleins af dat geluk-dempers jou kindjie se lig wil demp. Daardie kind se siel breek stukkie vir stukkie.

My hart is diep seer die laaste tyd van woede, teleurstelling en byna ‘n gevoel van bitter teenoor die menswees. Stilletjies word soveel mense se liggies gedemp.

Dan kom daar dae wat God ingryp en my herinner dat niemand die reg het om my liggie te demp nie. Dat Hy en net Hy alleen my vuurtjie sal laat brand. My siel, gees en hele menswees is belangrik en van waarde. My wese het betekenis. Ek is nie alleen nie. Ek is net soos ander, geregtig op geluk en dit sal en mag beleef. Ek sal nooit alleen wees as ek in Hom glo nie.

Danksy God word my liggie elke nou en dan ‘n bietjie sterker gestel sodat ek weer helderder kan skyn. Ek weet Hy sal nie toelaat dat hulle my liggie hier op aarde so sal demp dat dit nie weer wil brand.

Opinies maak of breek

Elke mens is geskape om sy of haar eie opinie te hê in byna alles in die lewe. Jou opinie is jou gevoel oor ‘n sekere ding of situasie. Sekere mense het sterk opinies en vir ander heg hul minder waarde daaraan. Tog is ‘n opinie ‘n maak of breek faktor. Opinies het al baie mense se harte gebreek, diep letsels gelos of selfs net ‘n groot impak op lewens gehad. Die mens is geneig om opinies te vorm baseer op ander mense se opinies, ervaring of sommer eenvoudige hoor-sê. Ek glo so baie in die engelse aanhaling, “don’t judge a book by its cover.” Dis vir my so mooi! Ek self was al ‘n hele paar keer in my lewe verras deur mense of dinge deur nie voor af na opinies te luister nie. Onthou, nie almal gaan van almal hou nie en nie almal hou van dieselfde dinge nie, maar dit beteken nie jy moet ook nie van daardie persoon hou of daardie ding/ervaring hou as gevolg van iemand anders se opinie nie. Vorm jou eie opinie eerstehands. Ek het ‘n hele rukkie terug ‘n vriendin verloor as gevolg van ‘n situasie wat gebeur het en tot vandag toe is my hart diep seer daaroor, maar dit bly vir my ‘n private-ding. Wat tussen ons gebeur het was tussen ons en dit sal onregverdig wees van my om ander mense se opinies te beïnvloed deur my situasie. En ek dink soveel vriendskappe en verhoudinge word dikwels beïnvloed deur opinies wat nie privaat bly nie. Jy vorm ‘n “liking” of “disliking” in iemand nog voor jy daardie persoon ontmoet het en of sy of haar storie ken. Ons is so geneig om mense af te skryf en te oordeel oor opinies, nog voor jy die persoon se storie ken. Elke persoon dra sy of haar eie kruis, jy weet nie waardeur daardie persoon gegaan het of gaan nie. Ek’s ‘n feite mense. Gee my feite en ek voel veilig. Feite gee jou die waarheid. Of dit nou reg of verkeerd is - dit is wat dit is. Jy weet dan waarmee jy werk en hoe dinge lyk en dan kan jy ‘n regverdige opinie vorm. Elkeen is ook geregtig op ‘n opinie en ons moet dit ook respekteer. Solank daardie opinie goed deur dink is en dit wel baseer is op feite en goeie bedoeling. Fisiese letsels is soms vir altyd daar om te sien, tog vergeet mens die pyn. Emosionele letsels sien jy byna nooit, maar daardie seer vergeet mens nie sommer. Kom ons deur dink ons opinies. Dit kan ander maak of breek.