top of page

Die Grootste Geveg: Jou hart teen jou kop, en jou kop teentyd.

“Nou en dan, verloor ek my pad. In die storm, sonder ‘n kompas, weet nooit waar die spore my vat of wat lê voor daar op my pad. Niemand weet hoe lank is die lewe, of hoe kort is die reis.”

Ons almal was al by so ‘n kruispad in ons lewe. Net wanneer jou hart jou kop

oortuig het om ‘n tree in geloof te neem, moet jou kop rusteloos en soms

roekeloos baklei om tyd te oortuig om of stil te staan, of te vlieg. Dit is soos om

die hele jaar lank uit te sien vir ‘n Desember vakansie - en voor jy jou oë uitvee is

al die beplanning, al die slapies af tel, die borrelende afwagting, die enkele

dae, die honderde kilometers, die skaterlag en die stroopsoet herhinneringe van

elke kosbare oomblik saam geliefdes of die ontnugterende tyd saam met

jouself, juis dit -‘n vlietende herhinnering, splinternuut toegedraai in jou hart se

vakansie kamer.


Soos ons die nuwe jaar betree, wens ons almal mekaar voorspoed toe. En dit is

werklik my wens vir jou & jou geliefdes – ‘n jaar vol voorspoed, goedheid en

guns. Hierdie jaar lyk voorspoed vir ons elkeen anders. Dit lyk soos inneem,

eerder as net lees. Dit lyk soos transformeer, eerder as net verander. Dit lyk soos

gee, eerder as neem. Dit lyk soos aanmoedig, eerder as kritiek en oordeel lewer.

Dit lyk soos voel, eerder as net sien. Dit lyk soos luister, eerder as net hoor. Soos

optree, eerder as net praat. Dit lyk soos bewustelik gesonder leef, eerder as net

relatief gesond wees. Dit lyk soos kosbare tyd saam met hartsmense wat mekaar

kan druk wanneer ons hopelik weer op ‘n Saterdag ‘n rugby wedstryd kan kyk of

die oggendure groet met lekker skaterlag om ‘n knetterende vuur. Dit lyk soos

leef, eerder as net oorleef.


Tyd is die grootste paradoks van hierdie onvoorspelbare tyd. Tyd is nie jou vriend

nie, want van hom het ons nooit genoeg nie. Tot ons genoeg van hom kry, dan

weet ons nie wat om daarmee te maak nie. Ek dink ons hanteer soms ons

seëninge soos tyd. Ons bid vir een ding, en verwag iets anders. Hou op tyd mors

om iets te skryf, net om dit uit te vee. Om iets te skep, net om dit nie te voltooi of

nie met die wêreld te deel nie. Om een tree vorentoe te gee, net om twee tree

terug te gee. Ek bid dat ons hierdie jaar in alle omstandighede sal leer om

vrouens te wees wat braaf is. Braaf om asbsoluut die unieke, opregte en rouste

weergawe van jou eie wese te wees soos God daaroor gedroom het en te

vetrou dat alles in jou lewe op tyd is en betyds is, selfs al is dit nie op jou tyd nie.


Skryf, want jy weet Wie hou die pen vas. Skep, want jy weet Wie is die kreatiefste

Skepper en kunstenaar van die heelal. As jy vorentoe tree, moenie die plek

waar jy was as ‘n ‘vangnet’ opsie beskou nie, maar eerder as ‘n bousteen, ‘n

herhinnering van die keer wat jy alles oorkom het wat op jou pad geplaas is om

jou te probeer vernietig. Dit is soos om van klippie na klippie oor ‘n rivier te spring

– die maklikste manier is nie noodwendig reguit vorentoe nie, daar sal

kronkelpaaie van gladde plat of skerp rotse wees en ‘n stroom wat jou voete

onder jou wil uitslaan. Maar wanneer vorentoe kyk onmoontlik lyk, en links en

regs jou bang maak, kyk na bo en onthou waar jou krag vandaan kom.


Die vyand sal alles in sy vermoë probeer doen om die ritme tussen jou hart, jou

siel, jou gemoed, jou verhoudings, jou gedagtes en jou intieme gesprekke met

die Here te pootjie. Dit mag dalk lyk soos vasklou aan die verlede, of dit kan lyk

soos ‘n konstante vrees vir ‘n onbekende toekoms, dit mag dalk selfs lyk soos ‘n

lank vooruit beplande dagboek om besig te bly – bloot omdat ons koek en tee

saam geliefdes verslind soos ‘n Black Friday sale want ons is bang om weer so

lank afgesonder en alleen te wees.


Ken jou perke. Wees ten volle bewus en versigtig waarmee jy jou koppie opvul.

Jou verlede is lank reeds vergewe, jy kan dit nie verander nie so jy kan net

sowel jouself vergewe. Vergifnis is moeilik wanneer jy nooit die ‘jammer’ gekry

het wat jou hart dalk nodig gehad het om te hoor nie, maar dit maak jou vry. Ek

weet dit is makliker gesê as gedaan, en die proses vat tyd – maak tyd, dit is die

moeite werd om die ekstra gewig van haat af te skud eerder as die ekstra

vetjies soos meeste se nuwejaarsvoorneme. Moet nie vir jou verlede settle net

omdat dit bekend en beskikbaar is nie.


Ons kan met ‘n geruste hart ‘n onbekende toekoms aan ‘n alom-bekende God

toevertrou. God belowe oor en oor dat wat Hy vir Sy kinders beplan het, net


goed is, en ek kies om dit te glo. Wat ‘n besige skedule betref...don’t be fooled.

‘n Vrou met ‘n gesonde ritme tussen haar hart, siel en gees en ‘n goeie balans in

haar lewe kan baie meer vir diegene rondom haar beteken as ‘n vrou met ‘n

oorvol skedule en opgedroogte siel. Moenie jou eie koppie leegmaak terywl jy

besig is om jou skedule vol te maak nie. Dit is nie net okay om beset te bly vir

mense, plekke en gebeurtenisse nie, dit is noodsaaklik.


Dit is tyd om elke fout en vrees wat jy al so lank in jou hart se tuin water gee, uit

te ruk. Dit is waar wat hulle sê, onkruid vergaan nie, maar ons hoef nie plek te

maak vir giftige gewoontes, gedagtes, vriendskappe of verhoudings in die jaar

wat voorlê nie. Selfs al lyk die blomme van ‘n onkruid plant soms mooi, is dit ‘n

indringer plant vir ‘n rede. Bewaar jou hart teen droë riviere, gooi diesel, gooi

paraffin, identifiseer die indringers in jou lewe en wend ‘n doelbewuste poging

aan om daarvan onstlae te raak.


Let op na jou gewoontes, Mooiste Vrou (en elke man) want dit bepaal die

rigting van jou lewe. Die sade wat jy elke dag in jou eie seisoen saai, is die oes

wat jy later gaan maai. Moenie hierdie seisoen afskeep omdat jy wens jy was in

‘n ander seisoen nie, gebruik die tyd om te leer wat jy moet om ten volle toegrus

te wees vir die seisoen wat voorlê. Hoe jy jou tyd spandeer bepaal die kwaliteit

van jou gedagtes. Jou gedagtes val soos sade in jou hart se lande, so wees

versigtig wat jy plant.


Ek hoop hierdie jaar kies jy geloof bo vrees, verwagting bo vrees, opwinding bo

vrees, braafheid bo vrees. Alles bo vrees. Want God het belowe dat ons niks

hoef te vrees nie. Dit is nie die toekoms wat Hy vir ons beplan het nie.


Versies van Bemoediging:

“Let me hear Your lovingkindness in the morning, for I trust in You. Teach me the

way in which I should walk for to You I lift up my soul.”

Psalm 143:


“You will keep in perfect peace all who trust in You, all whose thoughts are fixed

on You.”

Isaiah 26:3


“She is pressing on to what He has promised her. Therefore she has no fear of

what lies ahead. Whatever battle He has called her to wage war against this

year she can advance knowing He has already given the victory into her

hands.”

Judges 1:2


“For I know the plans I have for you, declares the Lord. They are plans for good

and not for disaster, to give you a future and a hope.”

Jeremiah 29:11


Liedjies vir die Week:

Phil Wickham – Battle Belongs

Demi Lee Moore ft. Riaan Benade -There Was Jesus

Cory Asbury – Egypt

Loki Rothman – Op My Pad

Bernice West – Sinkertjie & Chrome Clouded


Baie liefde,

Rouxnette

1,863 views1 comment

Related Posts

See All
bottom of page