• Anonymous

Jou man se verslawing is nie jou skuld nie.

My man, my liewe man, die persoon vir wie ek so lief is, is verslaaf aan pornografie. My hart was stukkend, ek het yskoud geword, my hele wese binne my het begin bewe en ek wou nie glo wat ek op sy search history sien nie. Hoe kan dit waar wees? Ons is skaars 4maande getroud! Ek is nie goed genoeg vir hom nie. Hy wil iets anders hê. Ek is te vet. Ek lyk nie soos daai meisies nie. Hierdie was van die eerste gedagtes wat deur my kop gegaan het en dit het my uitmekaar uit gebreek.


Ek het die volgende dag al begin dieet net om beter oor myself te voel. Ek het dit definitief nie op daardie tydstip geglo nie, maar mooiste vrou, DIT IS NIE WAAR NIE. Jy is genoeg. Al daai gedagtes, is leuens van die duiwel af. Hy wil jou huwelik op breek en jou laat glo dat jy ‘n aandeel aan sy verslawing het en dat dit selfs jou skuld is omdat jy nie goed genoeg is vir hom nie.


Ek was so kwaad, verneder, teleurgesteld en net hartseer. Ek het verraai en goedkoop gevoel. Wat beteken ons huwelik vir hom? Hoe kon hy dit aan my doen as hy vir my lief is? Ek het aande wakker gelê en artikels op die internet gelees, op soek na iets om my te help, selfs net om bietjie te verstaan. Ek het probeer verstaan waar dit vandaan kom en hoekom hy dit gedoen het. Niks wat ek gelees het, het my laat beter voel nie. Hoe meer ek gelees het, hoe meer het ek besef dat dit ‘n baie moeilike en lang pad is om te stap. Ek het ook besef dat dit vir die vrou wie se man verslaaf is, ‘n baie alleen-pad is. Ek het nog nooit so alleen gevoel nie. Ek wou my man beskerm, ons perfekte lewe beskerm, ek wou dit nie met my ouers of familie deel nie, want hoe lief en dierbaar hulle okal mag wees ek wou nie gehad het dat hulle met ander oë na hom moes kyk nie. Ek wou nie ons vriendskappe swaar maak deur so iets daarop te laai nie. En al weet ons almal dat ons nie moet oordeel nie, bly ons maar net mens, wat oordeel en praat en wonder. Ek kon met niemand praat nie, net in stilte bid en hoop dit verdwyn.


Ek het soveel vrae gehad, maar sonder antwoorde. In my geval was ek baie gelukkig, want my man het

werklik berou getoon. Hy het erken dat hy al vir jare daarmee sukkel. Hy het vir my vertel van vele

probeerslae wat hy op sy eie probeer vry kom het daarvan, maar elke keer misluk het. Hy was stukkend

en skaam oor hierdie donker geheim wat hy saam met hom moes dra. My hart was so seer omdat my

man homself verwyt het oor die seer wat hy veroorsaak het. Hy was bereid om dit aan die lig te bring en

met sy pa daaroor te gaan gesels. Gelukkig is my man geseënd met ‘n gelowige pa wat hom in gebed sal

dra en saam met hom sal bly bid en vertrou op God se groot mag. Sy las het nog ligter geword na hy met

sy ma en sussie gepraat het sodat sy geloofsfamilie saam met hom kan bid en hom ook kan ondersteun.

‘n Liefde van ‘n Ma bedek alles. Ek het besef dat sonde en skaamte ons vasgevang hou en weerhou van

genesing en vergifnis. Dit verhoed ons om ‘n lewende verhouding met God te hê. In Efesiërs 5 belowe

die Here dat hy jou sal vrymaak van al jou sonde mits jy dit na die lig toe bring en bereid is om dit te laat

gaan.

“Do not participate in the unfruitful deeds of darkness, but instead even expose them; for it is disgraceful

even to speak of the things which are done by them in secret. But all things become visible when they are

exposed by the light, for everything that becomes visible is light.” Ephesians 5: 11-14


Wanneer ons werklik glo dat God ons vergewe het omdat ons jammer is kan genesing en restorasie begin plaasvind. Die donkerte sal in lig verander, die skaamte sal ‘n getuienis word, die seer sal ‘n glimlag word, die gebroke vertroue sal sterker word en jy as mens sal weer heel wees met die wete dat God jou onvoorwaardelik lief het.


‘n Pornografiese verslawing is nie ‘n geveg teen vlees en bloed nie, maar teen bose geeste. In ons geval

teen die “Spirit of lust” – ek was ook oorweldig deur hierdie konsep. Ek het in ‘n wonderlike, Christenhuis groot geword en hierdie onderwerp was taboe, want ‘n mens karring eenvoudig nie aan geeste nie. Hier is ‘n definisie: “Satan, fans the flames of lust in the hearts of men and women. Playing on one of the strongest urges of nature- one that, when controlled, is one of God’s great gifts to mankind. Satan has down through the ages perverted it, wherever he can, for the destruction of his victims.”- by Christianity Today.


Jou man het jou nie opsetlik seergemaak nie.

Ongelukkig gebruik die duiwel fisiese intimiteit wat so mooi behoort te wees tussen ‘n man en vrou in

die huwelik om verwoesting te saai. Die duiwel weet sy tyd raak min en sy grootste doel is om verhoudings op te breek. Maar gelukkig is my God groter, sterker en almagtiger as hy. Ek het gebid en die duiwel en sy bose magte uit ons huis uit gejaag, want hy het geen plek in my huis, is ons gedagtes of in ons slaapkamer nie. Hy is gemors. Ek het so trots en sterk gevoel omdat ek toegerus was met die Wapenrusting van God (Efesiërs 6) om die duiwel te verslaan.

Nee, ons is nie deur dit nie. Hoe meer die Here in ons huwelik gewerk het hoe groter was die aanslae

van die duiwel. Twyfel en wantroue het kort-kort ingekruip. Dit is moeilik, dit is baie moeilik om so te moet baklei vir dit wat eintlik joune is. Ek het baie dae gevoel dat ek net so graag weer wil gelukkig wees. Party dae was ongemaklik in die huis, ek het al hoe verder emosioneel en fisies van my man af begin voel, grotendeels ook omdat ons op ‘n seksuele vas gegaan het, want die slim mense se artikels het gesê dat dit 90 dae vir jou brein neem om nuwe neurologiese paaie te skep. Ons het regtig alles probeer. En dit het goed gegaan vir ‘n hele ruk. Ons het baie groei in ons geestelike lewe ervaar.

Nog ‘n toets het oor ons pad gekom. Ek was weg vir ‘n paar dae om by my ouers te gaan kuier en my

man het ‘n terug slag gehad en dit was verskriklik om dit uit te vind. Die vertroue wat opgebou was, was

daarmee heen. Ek het hom gekonfronteer en hy het dit ontken en dit het dit nog erger gemaak omdat

ek die waarheid geweet het. Die seer was weer van vooraf, dit het gevoel of ons oor moet begin. My

man was hierdie keer nog meer stukkend en het vir my gesê dat hy soos ‘n mislukking voel en nie verlos

kan word nie. Weereens was die duiwel besig om te lieg om hom te laat skuldig voel. Hy het skoon bleek

gelyk en ek het nie geweet hoe om hom te help nie.

Dit het gevoel of ek weer aan die onderkant van hierdie berg staan (net met plakkies aan) en letterlik nie

krag het om dit weer te moet uitklim nie. Ek was kwaad vir die Here. Ek was innerlik moeg en leeg en

weer net bitterlik alleen. Maar die Here bly getrou en Sy genade en liefde is GENOEG wat beteken dat

ons niks meer nodig het nie.


Ons het weer die pad begin stap. Ek het geweet dat ek dit nie sonder die Here se krag en goedheid kan

doen nie. Ek het voor die spieël gestaan en vir myself gesê: “Wees sterk, niemand anders kan vir jou part

sterk wees nie!” Maar die keer het ek nie so alleen gevoel nie. Ek het die Here se nabyheid gevoel en sy

vrede ervaar. Ek hoef nie genoeg krag en wysheid vir die volgende jaar te kry nie, net vir vandag. Een

dag op ‘n slag.


Ek dink nie ek het die eerste keer in volle genesing en herstel geglo nie, maar vir God is niks onmoontlik

nie. Ek het my man vir Hom terug gegee, want dit is Sy seun. Hy sal hom verlos. Ek glo dit en ek spreek

dit in die Naam van die Vader, die Seun en die Heilige Gees.


Liewe vrou, indien jy vir jou man moet bid- moenie jouself onderskat nie. Jy is sterker as wat jy dink. Die Here wil jou man genees, Hy wil sy verlore skaap gaan terug haal en saam met Sy engele die oorwinning

vier. Moenie vir een oomblik glo dat sy foute en besluite jou skuld is nie. En moenie glo dat hy dit

gedoen het omdat hy nie vir jou lief is nie. Die duiwel is boos, dit was nie jou man se keuse nie- hy was

net vasgevang. Jy is meer as genoeg en geliefd. Moenie ophou saam met God baklei vir jou huwelik nie.

Dit is nie maklik nie, maar jy het die beste spanmaat met God aan jou kant. Die Here sal jou seën en jou

verstom laat terug kyk na hoe mooi en goed jou verhouding uitgedraai het. Hy ken jou hart se begeertes

in die fynste detail en wil vir jou net voorspoed beplan, maar hy wil hê dat jy jou hart met Hom moet

deel. Onthou dat die Here niks oor jou pad sal stuur wat jy nie kan hanteer nie.


Ek sluit af met hierdie woorde van Lysa Terkeurst, ek het dit in haar boek gelees “Forgiving what you can’t forget”

The ability to see beauty again is what I want for you and for me. Forgiveness is the weapon. Our choices moving forward are the battlefield. Moving on is the journey. Being released from that heavy feeling is the reward. Regaining the possibility of trust and closeness is the sweet victory. And walking confidently with the Lord from hurt to healing is the freedom that awaits.”

Baie liefde!

555 views0 comments

Recent Posts

See All