Wees JY, sonder om jammer te wees in 2021- ♡

Op die eerste dag van die nuwe jaar is die moontlikhede en geleenthede oneindig. Elkeen van ons het ‘n geleentheid gekry om ‘n nuwe bladsy om te slaan en te begin skryf aan dit wat ons graag wil bereik in 2021. Ons is al besig die laaste paar weke om te beplan aan ons nuwejaars doelwitte of voornemens. Ons maak seker dis reg vir die nuwe jaar, dat ons niks mis nie.

Wat as 2021 tyd is vir ‘n nuwe begin? In plaas daarvan dat ons lang lysies skryf met streng doelwitte en voornemens moet ons dalk nuwe tradisies aandurf as vrouens in 2021. Dis dalk tyd vir ‘n nuwe begin. Hoekom besluit ons nie om die ‘n jaar van temas, intensies of seisoene van vreugde te maak nie? In plaas daarvan om soveel streng riglyne vir onsself te stel waarvolgens ons moet lewe, hoekom besluit ons nie eerder om ‘n tema te kies waarvolgens ons, ons lewe in die nuwe jaar wil lewe nie. ‘n Tema kan ‘n idee word, of ‘n enkele doelwit wees waarvolgens jy besluit om jou 2021 te leef.

Om wel te besluit op ‘n woord, tema of enkele doelwit moet ons reflekteer op dit wat ons persoonlik in die jaar beleef het. Ek gaan beslis nie op die eerste dag van 'n nuwe jaar herhaal wat ek beleef het in 2020 nie, want niemand wil dit weer ervaar nie. Maar 2020 het vir my die volgende geleer: "Op die ou end van die dag is dit klein veranderinge wat ons daagliks aanpak wat ons sal uitbring by ons seisoen van vreugde". Om jou seisoen van vreugde of lewenstema te bereik moet elke dag van die nuwe jaar aangepak word soos wat geloof beskryf word. Om te glo, is om seker te wees van die dinge wat ons hoop, om oortuig te wees van die dinge wat ons nie sien nie. Omdat ons glo, weet ons dat die wêreld deur die woord van God geskep is. Net so moet ons in die nuwe jaar met alles wat ons daagliks aanpak glo ons gaan ons seisoen van vreugde bereik. Ek het voordat ek die week se stukkie geskryf het, baie gaan reflekteer oor dit wat die ander MooisteVrou skrywers deur die jaar gesê het. Ek kan met alle eerlikheid in my hart sê dat ek met elke liewe stukkie iets geleer en kon dit êrens in my eie lewe toepas. Maar ek het ook die tema van vrou wees waarvolgens ek my 2021 gaan leef raakgesien. Onversoenlik. Ons as vrouens is so geneig om vir alles en almal om ons, om verskoning te vra dat ons dit gebruik sonder dat dit werklik nodig is. Ons is so gesteld daarop om ander mense gelukkig te hou dat ons jammer sê vir dinge wat eintlik nie 'n jammer verdien nie. Ons sê jammer wanneer ons vir onsself persoonlike grense stel. Ons sê jammer as ons, ons eie opinie gee en ander hou nie daarvan nie. Ons sê jammer wanneer ons 'n oomblik vat om onsself te vind. Ons sê jammer wanneer ons 'n oomblik beleef waarin ons menslikheid rou en blootgestel is. Ons sê jammer dat ons nie perfek is nie en ons sê jammer as as ons opstaan vir dit waarin ons glo. Om jammer te sê vir ander moet gebruik word wanneer ons iets verkeerd gedoen het. Dit moet beslis nie gebruik word vir die feit dat jy jou lewe ten volle leef en die feit dat jy getrou is aan wie jy is nie. Jy gaan altyd te veel wees vir iemand anders. Jy gaan altyd te groot, te veel wees, te anders en te vreemd wees. Die oomblik wanneer jy jou 'te' element gaan skaaf om aan te pas by ander gaan jy die spesiale God geskape JY verloor. Ons moet jammer sê vir ons foute. Ons moet jammer sê as ons iemand anders teleurgestel of seergemaak het. Maar ons kan nie die jaar jammer sê vir wie en wat ons is nie. Leef die jaar volgens jou waarheid. Deel jou liefde, vreugde en opgewondenheid sonder om jammer te sê as jy te veel is. Deel jou entoesiasme. Wees braaf, vertrou en glo dat God jou sal krag gee om die jaar jou lewenstema te bemeester. MooisteVrou my wens vir elkeen van ons is dat ons op ons eie onversoenlike manier die jaar sal aanpak. Sorg dat geluk 'n prioriteit is en deel is van jou tema van 2021. Geniet elke klein, groot of middelmatige verandering wat in jou lewe gaan plaasvind. En moet nooit jammer wees vir die spesiale, mooiste en unieke vrou wat God jou gemaak het om te wees nie. Mag jy die jaar jou seisoen van vreugde vind deur jou tema elke dag ten volle te skryf. Mag jou verhouding met God versterk en mag jy meer tyd en liefde ervaar van jou naastes as wat jy ooit van te verhore gedoen het.

- Liefde Charné ♡

1,650 views0 comments

“Attitude is a choice. Happiness is a choice. Optimism is a choice. Kindness is a choice. Giving is a choice. Respect is a choice. Whatever choice you make makes you. Choose wisely.”
― Roy T. Bennett

Cape Town

All rights reserved © 2020 by Mooistevrou

  • Black Instagram Icon
  • Black Pinterest Icon
  • Black Facebook Icon